أنا حقيقي مش عارفة أتصرف إزاي، وحاسة إني في كابوس مش قادرة أستوعبه. أنا متجوزة بقالى ست شهور، وحامل في الشهر الرابع، وعشت حياتي مقتنعة إن جوزي راجل محترم، لحد ما حصل اللي عمره ما كان ييجي في بالي. أختي كانت بتيجي تزورني دايمًا، علاقتها بجوزي كانت زي الأخ وأكتر، بتحكي له أسرارها وبتعتبره واحد من العيلة. في مرة كنا بنتكلم عادي، وجه الكلام عن العلاقات الزوجية، واتكلمنا في حاجات بسيطة، وما أخدتش في بالي وقتها، بس بعد كده لما أختي جات تاني، بدأت أحس إن جوزي بيحاول يفتح في نفس المواضيع دي تاني بطريقة مش مريحة. حسيت إن في حاجة غلط، بس قلت يمكن أنا بفكر بزيادة. لحد ما في يوم، أختي كانت بتتغدى معانا، وأنا ملاحظة إنه مش طبيعي، نظراته غريبة، وطريقة تصرفاته مش مريحة. شكيت إن في حاجة مش مظبوطة، فقررت أدخل الحمام وأراقب من بعيد، بس لما طلعت لقيتهم قاعدين عادي، قلت يمكن شكي في غير محله، لكن إحساسي كان بيقولي غير كده. بعد ما جوزي نام، كلمت أختي وقلت لها بالحرف: "أنا شاكّة إن في حاجة حصلت، قوليلي بصراحة." سكتت شوية، وبعدها قالت لي إنها مكنتش هتيجي لي تاني، لأنها اتصدمت من اللي حصل. سألتها: "عمل إيه؟" قالت لي إنه حاول يرفع التيشرت بتاعها، وهي شالت إيده، وبعدها حاول يحط إيده على صدرها. أنا مش قادرة أستوعب، حاسة أن الدنيا بتلف بيا، أواجهه وأقوله إني عرفت؟ ولا أسكت وأدبر حياتي الأول؟ أروح لأهلي وأحكي لهم؟ ولا أتصرف إزاي؟ حقيقي مش عارفة أعمل إيه، واللي في بطني زنبي إيه إنه يكون ليه أب بالشكل ده؟!