شتمني واعتدى عليّ هو وأهله ثم يريد أن أعود

كان في خلاف بيني و بين زوجي و ظلمني و اهانني و قالي هاتيلي راجل في عليتك فاقسمت ما هبات في البيت و اتصلت علي والدي يجي ياخدني فلما حضر حاول يحل الخلاف و يصالحنا و رفض ياخدني و قالي صومي علي يمينك.

تاني يوم اتصل عليا و علي زوجي و عزمه علي الغدا بنية سليمة و اتفق معاه علي الحضور لكن خلال اليوم وجدت معندوش نية يحضر فنبهته يتصل يعتذر فنطش و أخرني علي ما مشيت روحت بعد المغرب لوحدي.

بابا زعل جدا و قالي ده انا مستنيكم لحد دلوقت ما اكلتش و اتصل عليه يعاتبه و قالي ما دام مش ناوي تيجي اتصل عرفني ليه تسيبني لحد دلوقت مستني من غير ما اكل و طلب منه يعدي عليه بالليل و هو مروح ، جه بالليل كان بيتصل عليا لكن كنت نايمة فاتصل علي والدي يقوله انا هتاخر ساعتين تلاتة خليها تروح وانا يومين تلاتة لما ابقي افضي هبقي اعدي عليك.

والدي اتضايق و قاله انا مستنيك منين ما تخلص عدي عليا خد مراتك و روح، فاتصل عليا و سمعني كلام ملوش لازمة زي لولا البنت لكنت طيرتك بالتلاتة و والله ما تفرقيلي ولا تلزميني و عايش غصب فصعبت عليا نفسي و قولت له خلاص كل واحد يروح لحاله.

ولان مش معايا اي غيارات خالص ليا و لا لبنتي رجعت البيت آخد غيارات ليا و ليها و هناك اهله اتصلوا عليه رجع يبهدلني و يتهجم عليا و يحدف الشنط و يقولي انتي داخلة من غيرها يبقي تخرجي من غيرها وبيسحب مني المفاتيح فقولت له انت بتتعدي عليا و انا جاية لوحدي لو كان حد من اخواتي معايا ما كنتش تقدر تعمل فيا كده ، فامه سخنته قالت بتتهددنا باخواتها و ابوه حضر يتصل بابويا يقوله يلعن دينك و يلعن دين اولادك و بنتك رهينة عندي تعالي خدها ، و جوزي اتشجع علي الشر مع ابوه و امه تقولي تستاهلو.

و حاولت اخرج بيمنعوني فهددته اني هصوت و افضحهم لو ما سابونيش و هربت ، رجع بالليل يكلمني عايزني ارجع و انا خلاص ما اعرفش اصلح اللي بوظه فرفضت و تاني يوم بعتله مفاتيح البيت اللي ما عرفش ياخدها مني و حذفته من الاصدقاء ، بعت لي النساء اكثر اهل النار و مقالات مقالات من الدعوات عليا و تمني الاذي و الابتلاء و اشوفه في اعز حد عليا و معايرة و شتيمة.

رديت عليه باني مش همنع عنه بنته و لا هدعي عليه لانه ابو بنتي و لا هشوه سمعته و يظل بينا الاحترام و استمر في الشتيمة فيا علي مدار أسبوع يبعتلي شتايم و دعاوي و عايزني ارجع لكن مش شايف نفسه غلطان و شايف ان اهلي المفروض يرجعوني و يستاهلو الإهانة و شايف نفسه صح في كل حاجة و يبررها في اني كنت بهددته باخواتي رغم اني ما عملتش كده و ألفوا كلام انا ما قولتهوش عشان ما يطلعوش نفسهم وحشين.

 انا نفسيتي تعبت من كتر الحسبنة و الدعوات و ينشر علي النت هو و اهله و عماته و خالاته و عايشين دور الضحية بالله عليكم هو انا ظلمته و لا هو اللي خرب البيت ، و ارجع ازاي بعد ما سبوا الدين ليا و لاهلي و شايفين اني استحق ده و كأني انا المسئولة اصلح اخطاؤه و يقولي مش هعيش غير و راسي مرفوعة اللي عجبه عجبه و اللي مش عجبه يخليه عند امه و يشتمني و يدعي عليا