هل أتزوج دون توثيق؟

أنا أرملة، عندي 37 سنة ومعايا طفلين. اتقدملي شخص عمره 47 سنة، وأنا بصراحة مرتاحة له ومطمنة لكلامه، وهو كمان مرحب بيا وبولادي وبيقول إنهم هيكونوا مسؤولين منه ومش هيكونوا حمل عليه هو عايز الجواز يكون شرعي، يعني عند مأذون وبشهود وبوجود أهلي وعمه، لكن من غير توثيق رسمي في الدولة.

هو كمان هيجهزلي شقة كاملة من الألف للياء، وأنا مش هجيب أي حاجة، وبيقول إن كل حاجة في البيت هتكون بتاعتي وعلى ذوقي. أهلي معترضين جدًا على موضوع عدم التوثيق، وبيقولوا إن كده يعتبر جواز عرفي وشكلنا هيبقى وحش، وكمان عايزينه يكتب قايمة ومؤخر. وهو شايف إن طالما هيجهزلي بيت كامل وكل حاجة فيه ليا، مش شايف ضرورة للقايمة بالطريقة اللي أهلي طالبينها.

أنا من ناحيتي بقول: حتى لو الجواز اتوثق رسمي، ده مش معناه إن الشخص مستحيل يطلقني في أي وقت لو هو عايز، وممكن أنا كمان بعد الجواز أكون مش مرتاحة وأطلب الطلاق. يعني التوثيق مش هو اللي هيضمن إن الجواز هيستمر للأبد. لكن أهلي شايفين إن التوثيق والقايمة والمؤخر ضمان ليا، خصوصًا إن معنديش مصدر دخل، ومكملتش تعليمي، ومش عارفة لو حصل طلاق هقدر أشتغل إيه.

وفي نقطة تانية مخوفاهم جدًا: لو أنا اتجوزت، أعمام أولادي ممكن يوقفوا مساعدتهم لينا، لأنهم شايفين إن بعد جوازي المفروض زوجي هو اللي يكون مسؤول عني وعن الأولاد. وأهلي خايفين إنه لو حصل طلاق بعد كده، أعمام أولادي مايبصوش في وشي تاني، وساعتها أكون خسرت سندي ومابقاش عندي مصدر رزق.

أنا بصراحة عايزة أتجوز وعايزة يكون في حد في حياتي، وحاسة إني مرتاحة للشخص ده ومقبولة منه، وفي نفس الوقت أولادي أهم حاجة في حياتي، وهو بيقول إنه مرحب بيهم وهيكون مسؤول عنهم. بس خوفي الحقيقي: هل أنا كده بكون بغامر بمستقبلي ومستقبل أولادي لو وافقت على جواز شرعي غير موثق؟ وهل كلام أهلي منطقي إن لازم يكون فيه توثيق وقايمة ومؤخر كنوع من الأمان، ولا فعلًا المهم الشخص نفسه والتزامه؟