قلبي مكسور من كلام بنتي عني!

السلام عليكم..

أنا أم لبنت عندها 15 سنة، والحقيقة أنا في حالة صدمة وحزن شديدين. بالصدفة شفت رسائل بينها وبين صاحبتها، ولقيتها بتتكلم عني بطريقة عمري ما كنت أتخيلها.

كانت بتقول إنها بتتكسف مني لما أوصلها المدرسة أو الدرس، وإنها أول ما تشوفني بتستعجلني أمشي. وأنا كنت فاكرة إنها مجرد طبيعة سن أو استعجال، وماخدتش الموضوع على قلبي.

لكن اللي وجعني أكتر إنها كتبت عن شكلي كلام قاسي، وقالت إنها بتستعر مني، وإنها كانت تتمنى يكون عندها أم مختلفة. وكمان قالت إني فاشلة، ومش بعرف أذاكر لها، ووصل بيها الكلام إنها وصفتني بألفاظ جرحتني جدًا، وكل ده لأنها زعلانة إني رافضة أجيب لها موبايل جديد في الوقت الحالي.

والأصعب من كده، إنها كاتبة عن أبوها بنفس الطريقة، وبتقول إنها كانت تتمنى يكون ليها أب وأم غيرنا.

أنا بجد مش فاهمة. إحنا في البيت بنتعامل مع بعض بشكل طبيعي، وبنتكلم ونضحك، وعمرها ما أظهرت لي المشاعر دي في وشي. وأنا والله عمري ما قصرت معاها، وبحاول أوفر لها كل اللي أقدر عليه، ودائمًا أشجعها على المذاكرة وأحلم أشوفها دكتورة أو تحقق أي حلم تتمناه.

دلوقتي أنا موجوعة جدًا، وحاسة إن كل تعبي معاها راح هدر. بقيت أسأل نفسي: هل أنا غلطت في تربيتها من غير ما أحس؟ وهل الكلام اللي كتبته ده هو اللي جواها فعلًا، ولا ممكن يكون مجرد انفعال أو تأثير سن المراهقة وصاحباتها؟

نفسي حد يطمني ويقول لي أتعامل معاها إزاي من غير ما أخسرها، لأن قلبي مكسور من اللي قريته.