السلام عليكم أنا بنت عمري ١٨ سنه، عندي رؤية معينة للشخصية الي ابي اكونها، ابي اكون بنت مثقفة ذكية وهادية وواثقه بنفسها، تابعت بودكاستات بس ما نفعتني كثير لان احس اغلب الناس الي تطلع تتكلم فيها مفصولين عن الواقع ما أحسهم عايشين نفس الحياه اللي الناس الطبيعيه تعيشها وما اقدر أتقبل الكلام والنصايح منهم مو كلهم بس اغلبهم احس نصايحهم من الذكاء الاصطناعي، عموما مشكلتي تكون في الالتزام، مقدر التزم بالروتين الي احدده لنفسي، سواء كان بسيط او معقد، جربت أضيف عادات صغيرة ليومي بس ماقدرت احافظ عليها.

ثاني مشكلة عندي هي اني إنسانة هادية بس عصبية بنفس الوقت، أنا لو احد ما تدخل بيومي بضل على وضع الصمت، لكن للأسف عندي اخوان مراهقين، احبهم بس مقدر أتقبلهم والمشكله بيتنا صغير فمقدر اعزل نفسي بمكان بعيد عنهم وهم مستفزّين زي اي مراهقين ومزعجين ومقدر احط حدود لهم، يوم احط حد يحسبوه تحدي ويسووا المستحيل عشان يتعدوه.

كلمت اهلي بس ابوي مو مهتم يحط لهم حد وامي مالها كلمة عليهم للأسف، فا اصير في البيت عصبيه ومتوتره طول الوقت وذا مو طبيعتي أنا انسانه احب الهدوء وأحب حدودي ومساحتي الشخصيه وأغراضي تكون ملك لي ووصلت مرحلة اكره نفسي واكره اخواني لأننا مو قادرين نوصل لحل وسط.

بخصوص هدفي بأنني اصير مثقفة، أنا إنسانة اعتبر نفسي ذكية عاطفيا وذا الشي خلاني أميل لعلم النفس وبما اني متفوقة دراسيا قررت ادرس الطب النفسي، أنا لسا بدخل ثالث ثانوي ان شاء الله اجيب المعدل الي يسمح لي ادخل ذا التخصص، كثير مهتمة ادرس المخ البشري، فأريد اعرف من وين ابدأ وايش المصادر الي بتسمح لي أتمكن ادرسها بشكل اعمق.

اريد كمان اعرف كيف ممكن أوصل لشخصية واثقة من نفسها، ما ابي اكون مثاليه او اجذب الأنظار، خلال دراستي السنه الماضية مثلت شخصية ماهي شخصيتي لاني كنت بصف مافيه احد يعرف شخصيتي الصدق، أنا بالعادة من البنات اللطيفات بزياده واوحي للي قدامي اني مقدر أدافع عن نفسي ومسالمه جدا واتكلم مع الكل، والشخصيه الي مثلتها عكس كل ذا.

الحين كل البنات الي بنتقل معهم يحسبوني بنت واثقة من نفسها وهادية وقليلة الكلام وأحب اقعد لحالي، صح ان الشخصيات عجبتني وكثير لقيت مدح من البنات ويبون يضموني لقروباتهم وشلتهم وذا شي أنا مو متعوده عليهم، لاني دايما كنت احس تفسي غير مرغوبه ولو اختفيت من الصف محد بيعرف، بس كمان احس اني خدعت الكل ودايما احس بينكشف اني انسانه خايفة ومو واثقه بنفسها صدق، فكيف ممكن أوصل للشخصيه الي ابيها بدون تمثيل؟