لماذا تراجع عن فكرة الخطبة؟

عرفت شخص زميل ليا، حصل بينا قبول، وقال لمامته عليا، وهي قابلتني أنا وماما وكانت متحمسة جدًا. بعد كده جه قعد مع بابا، وبابا ارتاح له، واتفق إنه بعد ما يخلص الـSummer Course يرجع هو وأهله رسمي، وده حصل فعلًا.

جم هو وأهله لقعدة الاتفاق، وكل حاجة كانت ماشية بشكل طبيعي جدًا. أثناء القعدة اكتشفنا لأول مرة إن قدامه سنة دراسة بسبب مواد متراكمة، وسنة جيش، وسنة شغل وتكوين نفسه، يعني حوالي 4 سنين. بابا قال إن 4 كتير، واتفقنا في النهاية إن قراءة الفاتحة تكون قريب والخطوبة بعد سنة، ومفيش أي خلاف حصل نهائيًا.

الغريب إن هو طول القعدة تقريبًا مكنش بيتكلم، وأخوه كان بيرد بدلًا منه. أنا عارفة إنه هادي فدافعت عنه، وقلت لأهلي إني موافقة ومستعدة أستناه.

بعد ما مشيوا، كلمته أطمن عليه، قال إنهم وصلوا وإنه رايح يقعد مع صحابه. بعتله بالليل "ابقى طمني عليك" ونمت. صحيت لقيته مكلمنيش وموبايله مقفول. قلقت عليه، فكلمت مامته، ففوجئت إنها بتقولي: "كل شيء قسمة ونصيب وربنا يعوضك." بعدها والده كلم بابا وقال إنهم صلوا استخارة وقرروا إن الكبير يتجوز قبل الصغير.

حاولت أكلمه عشان أفهم، لكنه مردش، وبعتلي رسالة بيقول فيها إنه صلى استخارة 3 مرات ومش مرتاح، وإن أنا وأهلي كويسين لكن هو مش مرتاح.

أنا بجد مش قادرة أفهم: إزاي شخص كان بيحبني وبيطلب مني متبعدش عنه، وأهله كانوا متحمسين وجم فعلًا لقعدة الاتفاق، وكل حاجة كانت ماشية طبيعي، يقرر بعد القعدة بيوم إنه مش مرتاح؟ وليه مكلمنيش أو واجهني بنفسه؟ خصوصًا إن مفيش أي حاجة حصلت مني أو من أهلي.

أنا قلتله: "ربنا يوفقك، بس أنت بتحجج ومكنتش قد كلامك واتخليت عني"، شاف الكلام ومردش. أنا بس محتاجة أفهم: إيه اللي ممكن يكون حصل ولي اتخلي عني ومواجهنيش ؟