كيف نجعل والدي المسن يعيش حياة كريمة؟

أمي متوفية بقالها ست شهور وأبويا عنده 75 سنة وطلع على المعاش ومعاشه ما شاء الله فوق 8 آلاف جنيه وإحنا اتنين اخوات بس من بعد ما أمي ماتت وأبويا حالته النفسية بقت وحشة جدا.

وأخويا قال لي أبوكي مينفعش يتساب لوحده قلت له ما هو كده كده إنت ساكن في الشقة اللي في وشه وأنا في الشارع اللي وراه يعني إحنا رايحين جايين عليه ومحدش هيسبه لوحده ولو أنا مش فاضية ممكن أبعت العيال يقعدوا معاه والوقت اللي أكون فيه فاضية أنا هقعد معاه.

واتفقنا على كده لكن من حوالي تلات شهور أبويا كان داخل يتوضى علشان يصلي واتزحلق في الحمام ووقع على دماغه واتكسرت إيده ورجله وحصل له نزيف في المخ وربنا نجاه منه ومن ساعتها بقى محتاج رعاية ومتابعة.

أخويا قال لي أبوكي كده مينفعش يتساب لوحده وأنا هاخده عندي في شقتي وأتولاه أنا هعرف أغير له وألبسه وأكله وأتابعه قلت له والله يبقي كتر خيرك وأنا من وقت للتاني هاجي ولو احتجتوني في أي حاجة أنا موجودة.

وفعلا أخويا أخد أبويا عنده وأخد الفيزا بتاعته وبقى هو اللي بياخد معاشه علشان يصرف عليه ويجيب له علاجه، لكن كل ما كنت أروح أشوف أبويا ألاقيه مش في حال كويس هدومه مش نضيفة ومش واكل وسريره مش نضيف والأوضة اللي قاعد فيها مش نضيفة وساعات علاجه موجود وساعات لأ فكنت كل مرة أروح أنضف له وأغير له وأعمل له لقمة من بيتي وأجيبها له وأقعد معاه وأغيب يومين تلاتة وأرجع ألاقي حالته أسوأ من الأول.

فقلت لأخويا خلاص رجع أبويا شقته وأنا هفضل رايحة جاية عليه أنا وجوزي ونبقى قريبين منه ولو في مرة احتاجنا جوزي يساعدني في حاجة أو يغير له أو يحميه أو يعمل له حاجة هيقدر ييجي معايا ويساعدني، لكن لو إنت مش موجود مينفعش أنا وجوزي نيجي نقعد عند أبويا ومراتك تبقى لوحدها.

فقلت له رجع أبويا شقته وخليه في بيته وأنا هبشره وأتابعه لقيت أخويا بيقول لي لأ أنا مش هينفع أرجع أبوكي شقته قلت له ليه قال لي أنا من أول الشهر هأجر شقته قلت له شقته مين قال لي شقة أبويا عشان الدنيا معايا مش على قد كده وظروفي وفيه مشاكل في المصاريف وأنا محتاج فلوس.

قلت له إنت بتقول إيه إنت أصلا واخد الفيزا بتاعة أبوك وبتاخد معاشه ومعاش أبويا ما شاء الله مش قليل ده فوق 8 آلاف جنيه ومرة بتجيب له العلاج ومرة ما بتجيبهوش وأنا لما بروح له ألاقيه ساعات مش واكل وهدومه مش نضيفة وسريره مش نضيف والأوضة اللي قاعد فيها مش نضيفة وكمان ده إنت ومراتك وحتة عيل لسه عنده تلات سنين ومرتبك كويس إزاي بعد كل ده عايز تأجر شقة أبوك.

كمان قلت له طول ما أبويا عايش الشقة دي مش هتتأجر دي شقته وهو لسه عايش ومش معنى إنك قعدت أبويا عندك علشان تتابعه وإنه بقى عندك إننا نطلعه من شقته ونأجرها وهو على قيد الحياة من غير حتى ما ناخد رأيه.

الشقة دي أبويا أصلا كاتبها باسمي أنا وأخويا مناصفة وأنا والله مش بطلب منه الشقة ولا بطلب منه فلوس ولا عايزة آخد نصيبي ولا أعمل مشكلة على حاجة أنا جوزي ميسور الحال والحمد لله ومش محتاجة أخويا في حاجة أنا كل اللي بطلبه إن أبويا ياكل ويتعالج ويتباشر ويعيش في شقته معزز مكرم وما يبقاش تقيل على حد.

ومن هنا حصلت المشكلة الكبيرة بيني وبين أخويا هو شايف إني كده بوقف حاله وبقف في طريقه ومش مقدرة ظروفه وأنا شايفة إني مش بوقف في طريق حد ولا بطلب منه حاجة لنفسي أنا كل اللي شايفاه إن أبويا ساعات ما بياكلش لقمته وساعات ما بياخدش علاجه ومكانه مش نضيف وده كله ممكن يأثر عليه وهو في السن ده وبعد اللي حصله.

يعني أبويا قاعد لنا السنة دي ولا السنة الجاية ويا عالم يعني مش هيفضل معانا العمر كله وإحنا عايشين بدعوته فإحنا أولى الناس إننا نحافظ عليه ونستغل فرصة برنا بيه وهو لسه موجود مش نهمله أو ندوس عليه.

أنا نفسي أبويا يقعد في شقته معزز مكرم وأنا أفضل رايحة جاية عليه أنا وجوزي وعيالي والبيت يبقى مفتوح له ولو أخويا عايز يروح يقعد معاه بعيد عن أي حد أو يرتاح معاه أو يتكلم معاه يبقى عنده مكانه ويبقى لأبويا مكان ولينا مكان وكل واحد يقدر يقعد معاه من غير ما يبقى تقيل على حد.

وأنا مش عايزة أخسر أخويا وزعلانة إنه شايفني بوقف حاله هو بيقول لي إن اللي أنا عملته ده هيكون قطيعة بيني وبينه وإنه مش هيعرفني تاني وأنا مش عارفة إزاي الموضوع وصل بينا لحد القطيعة علشان أنا طلبت إن أبويا يفضل في شقته ويتباشر ويتعالج ويعيش باقي أيامه مرتاح ولما يبقي ربنا ياخد أمانته أنا مش هقول لأخويا هات نصيبي ولا هقول له أنا عايزة منه حاجة أنا كل اللي يهمني دلوقتي إن أبويا وهو عايش يبقى ليه بيته ومكانه وما يحسش إنه تقيل على حد وفي نفس الوقت مش عايزة أزعل أخويا ولا أخسره علشان شقة ومصلحة أبويا.